Mark 4

Rᵾng Mong Mundi Uⱡ Ei Nga Ik Ek Ropa Nitim

1Wote tᵾnggᵾt kᵾn, Jisas ndi, num Galili nga ᵾldᵾ ila wamp mbᵾ kᵾn puⱡ mondpa, ik mbo inditim. Jisas murum ila wamp orung nimbᵾ ama minal elinga, Jisas aldpa kelpa omba, nu kanu nila, oⱡa mba rukᵾr nila mana murum. Nu kanu ni kᵾⱡ num nila, noi rukᵾr mba telinga, wamp ama puⱡi num ᵾldᵾ nila anggilik morung. 2Jisas ndi, ik ek puⱡi ropa wamp mbᵾ, ik mbo endpa, nimba mel, ”Ya pilᵾiya! Ui ti kᵾn, wu ti rᵾng mbo mundᵾmba purum. 4Wu ni, rᵾng mbo nimbᵾ, mepa andpa rᵾk kongun kona nila mundrum. Ni kᵾn rᵾng mbo mat nombuⱡa mam ila mana purum. Nimbᵾ kᵾi ndi, tᵾk norung. 5Rᵾng mbo mat mba mana ku titim pol ila mᵾi onunga etpa titim nila mana purum. Ni kᵾⱡ tᵾkrᵾpa mᵾlᵾ rurum. Nambuⱡ emel, mᵾi ei mandpa ti nᵾtᵾtᵾm. 6Wote, ant ei oⱡa omba rurum ei kᵾn, rᵾng mᵾlᵾ rurum ni kᵾⱡ, ant ei ndi, nomba kundrum. Ei nga, rᵾng pilkan kᵾⱡ mᵾi ila mana mba, kapⱡa iti nᵾtᵾtᵾm. Ei nga, rᵾng kᵾⱡ mᵾlᵾ ropa oⱡa omba, wote nondpa kurum. 7Wote, rᵾng mbo mat mana mba, kumbᵾⱡ nde ⱡembᵾⱡ na nila mana purum. Nimbᵾ, kumbᵾⱡ nde ⱡembᵾⱡ mbᵾ ndi, omba mam etpa, rᵾng mbo nimbᵾ, ropa mana nduⱡnga, rᵾng mbᵾ oⱡa omba ropa muⱡ pi nᵾpᵾtᵾm. 8Wote rᵾng mbo mat, mba mᵾi kona kai ila mana purum. Rᵾng mong mbᵾ, mᵾlᵾ rok kai mondᵾk, oⱡa ok rᵾng mong puⱡi rurung. Rᵾng mong mat 30 nimba mong rurum, mat ndi 60 nimba rurum, mat ndi 100 nimba rurum,” nitim.

9Wote, Jisas ndi nimba mel, “Kum nombuⱡa tem wamp ti ndi, na ik nᵾnt ei, kum tepa pilangga!” nitim.

Nambuⱡ Emel, Jisas Ndi Ik Ek Rurum

10Wote, Jisas ni elim kou murum ila, elim nga kitip kᵾni wu 12 ni kᵾⱡ kᵾn, Jisas ik nitim ila kum tek morung wamp nimbᵾ kᵾn ok, Jisas ik ek rurum ni nga, ik puⱡ mbᵾ, kundpa nangga nᵾk waldᵾtᵾng. 11Jisas ndi, wamp nimbᵾ kundpa nimba mel, “Got nga wamp tᵾpa mumuk rui uⱡ ei enim ngurum. Wote, wamp namin ya ekit orunga mormin kᵾⱡ, ik ek ila mint molk piling. 12Ei nga wote,

‘Wamp mbᵾ ndi, kᵾni nᵾkᵾning. Wote, kandᵾk mbi ndui nᵾnding. Wote, wamp mbᵾ ndi, ik ei unt pᵾtᵾng, wote pilik kun iti nᵾtᵾng. Wote, wamp mbᵾ ndi, uⱡ kit mbᵾ etᵾk, wote numan ropᵾl rui naruⱡᵾngina kᵾn, Got ndi, en enim nga uⱡ kit mbᵾ, wak rundi nandrᵾm,’” nitim.

Jisas Ndi, Rᵾng Mong Mundi Uⱡ Ei Nga Puⱡ Ei Ik Ek Ropa Nimba Ngurum

13Wote Jisas ndi wamp nimbᵾ waldpa, “Enim ik ek kᵾⱡ pili napᵾnmᵾn ye? Wote, nambuⱡ etᵾk enim ndi ik ek ei nga puⱡ ei piling nda? 14Wu rᵾng mbo mundrum ei, Got nga ik mong ei mbo mundrum. 15Wamp mat, rᵾng mbo ya nombuⱡa mam ila mana purum ei mel kapⱡa. Got nga ik mong kᵾⱡ pilik moⱡᵾngina kᵾn, Seitan ei ndi, rᵾk omba, Got nga ik mong kᵾⱡ tᵾpa mepa purum. 16Wote wamp mat, rᵾng mong kᵾⱡ ropa munduⱡnga, mba ku murum mᵾi pol ila mba titim ni mel kapⱡa. Wamp mat, Got nga ik mong ei tᵾngᵾnda mint pilik kᵾn, numan ei ndi kormin. 17Wote, Got nga ik ei numan ila mana mba pepa pilkan ngui nganggᵾrᵾm. Ei nambuⱡ emel, Got nga ik ila uⱡ mbun mindil pi mat, oⱡnga kandᵾk kᵾn, Got nga ik ei tᵾngᵾnda wak rormin. 18Wote wamp mat, ya kumbᵾⱡ nde ⱡembᵾⱡ kona ila mana purum ei mel. Wamp kᵾⱡ ndi, Got nga ik mong ei pil-ing. 19Wote, wamp kᵾⱡ ndi, en enim nga kᵾng orunga kont puk muⱡing ei nga numan ou nduk pilik, en enim wamp nuim muⱡing ei nga numan ou nduk pilik kᵾn, mel mbᵾ nga mint numan tᵾk mundᵾk, wote Got nga ik mong ei pili nᵾpiling. Wote, ik mong pil-ing kai kᵾⱡ ropa muⱡ pi napᵾmba. 20Wote wamp mat, rᵾng mong mat mᵾi kai ila mana purum ei mel, wamp mbᵾ ik ei pilik, tᵾk numan mbo ila pendᵾk, mek int puk wamp mat, mbo ronduⱡᵾngina kᵾn, wamp mbᵾ rᵾng mong kai rorum ni mel mat, ropa 30 itim, mat ropa 60 itim, wote mat, ropa 100 itim,” nitim.

Rᵾⱡang Ei Tᵾk Ming Ila Ʉk Rorung

21Jisas ndi, ik kat kundpa nimba mel, “Wamp nam ti ndi, lam kandpa mepa mukᵾr omba ming na rat pol mana orunga na mbila mondrum nda? Ei mon, lam kandᵾk mondᵾrmᵾn kona ila mondᵾrmᵾn ni ka! 22Mel namba mel mat, mo ropa tetᵾm mbᵾ, omba pena ila temba. Wote, ekit wangga wamp mbᵾ ndi kᵾning. Mel mat, panda ropa tetᵾm mbᵾ, ekit omba pena ila temba. 23Wote, wamp nam ti ndi, kum nombuⱡa tem ndam, ik ei pilangga!” nitim. 24Jisas ndi, wamp kᵾⱡ ik mong kat, kundpa nimba mel, “Numan tᵾk mundᵾk pilik kai itᵾi! Ya ik enim pilmin kᵾⱡ, uⱡ namba uⱡ ti nim ndi, ya mana mᵾi kona ila wamp ti kᵾn, kᵾmp tᵾkᵾn ngᵾn ei mel ku, Got ndi, i ku etpa, nim kᵾn minal kᵾmp tᵾmba. 25Wamp nam ti, mel ou ndupa tepa moⱡum wamp ei, wote mel ou ndupa ngumba. Wote, wamp nam ti, mel ou ndupa tepa muⱡi nambuⱡ mel, onunga kᵾralt tepa moⱡum ndam, kᵾⱡ elim kelpa int tᵾmba,” nitim.

Rᵾng Mong Mᵾlᵾ Ropa Oⱡa Orum Ei Nga Ik Ek

26Wote Jisas ndi, ik ek kat ropa nimba mel, “Got nga wamp tᵾpa mumuk rui uⱡ ei mel, wu ti elim nga kongun kona ila rᵾng mbo mundrum ni mel. 27Rumbuldi muna rᵾnggilmᵾ mbila wu ei, elim ur petᵾm muna morum ei kᵾn, rᵾng mong mbᵾ mᵾlᵾ ropa, ou etpa etᵾm uⱡ ei, nambuⱡ uⱡ etpa etᵾm, wu ei pili napᵾtᵾm. 28Mᵾi ei elim ndi, kongun elinga, rᵾng mong ei mᵾlᵾ ropa oⱡa omba omung ropa rᵾng ei ropa muⱡ petᵾm. 29Wote, rᵾng mong ei rupa ropa etᵾm ei kᵾn, wu ei ndi rᵾng mbᵾ puⱡ mondpa tᵾtᵾm. Nambuⱡ emel, ui ila rᵾng mbᵾ pora rupa ropa pelinga, tᵾk normᵾn ui ei,” nitim.

Rᵾng Mong Mastat Nga Ik Ek Ropa Nitim

30Wote Jisas ndi, waldpa nimba mel, “Tᵾn ndi, Got nga muⱡ kona ei, namba mel ei kᵾn, kapⱡa nimin? Ik ek nant kᵾⱡ ropᵾn namina ik ei, pilik poⱡ nduing? 31Uⱡ ei mel, wu ti ndi, rᵾng mastat nga mong ei, muⱡ uⱡ kona mbila pora, rᵾng mong mel wei kᵾⱡ, tᵾpa kongun kona ila mbo mundrum. 32Rumbᵾⱡ mat, omba puⱡnga kᵾn, nde mong ni, mᵾlᵾ ropa oⱡa omba, kongun kona elinga, nde mastat ou kᵾⱡ anggᵾtᵾm. Nde mastat kᵾⱡ nga puⱡa mbila, kᵾi mbᵾ ndi ok, mastat puⱡa po nᵾtᵾm mbila, mi manga rormin,” nitim. 33Jisas ndi, Got nga ik puⱡ mbᵾ wamp mbᵾ kᵾn, i etpa nimba ngurum. I ku etpa, ik ek ou ndupa ropa wamp mbᵾ, pilik teing nimba ngurum. 34Jisas ndi, wamp mbᵾ kᵾn, ik kun etpa kundpa ni nᵾndᵾtᵾm. Ik ek mint ropa kundpa nitim. Ei kᵾn wote, Jisas elim nga kitip kᵾni wu kᵾⱡ, mint molk kᵾn, Jisas ndi, ik ek rurum nimbᵾ nga puⱡ mbᵾ kundpa nitim.

Jisas Ndi Nilinga, Kᵾpkᵾ Mam Ni Kᵾr Nitim

35Ant tenda ila epindama Jisas ndi, elim nga kitip kᵾni wu kᵾⱡ kundpa nimba mel, “Tᵾn ya num ei puⱡa ropᵾn noi ᵾldᵾ orunga pamin!” nitim. 36Wote, wamp minal nimbᵾ, wak rok kᵾn, kitip kᵾni wu ni kᵾⱡ, Jisas mba rukᵾr murum nu kanu ila rukᵾr puk, Jisas ni tᵾk mek en enim kᵾn, rup rok purung. Nu kanu mat ila, kunda titim ku. 37Wote, ama kona kᵾpkᵾ mam ti ropa, num ni pᵾnᵾn nimba omba, num ni kildpa ropa omba, nu kanu ila rukᵾr mba. Nu kanu ni kᵾⱡ, nu ndi, peka romba itim. 38Jisas ni, nu kanu ni kᵾⱡ nga met tip nila, peng kilanda mundpa ur pitim. Kitip kᵾni wu ni kᵾⱡ ndi, Jisas ni, rok rut nduk nᵾk mel, “Ik mbo wu ye! Nim tᵾn nga nᵾkᵾn, pili napᵾn ye! Tᵾn nu wanggᵾpᵾn kuⱡmin enmin ei ka!” nᵾtᵾng.

39Jisas ni, rut nimba oⱡa anggilpa kona kᵾpkᵾ ni kundpa nimba mel, “Raka nᵾkᵾn muⱡi!” nitim. Wote num ni kundpa nimba mel, “Raka nᵾkᵾn muⱡi!” nitim. I nilinga kᵾn, kona kᵾpkᵾ ni rui narᵾⱡnga, num ndi, rurum ni mana purum. 40Wote Jisas ndi, elim nga kitip kᵾni wu kᵾⱡ, kundpa nimba mel, “Nambuⱡ emel enim mundmong enmin? Akup enim nga mondpa pili uⱡ ei, tek muⱡi nambᵾrmᵾn ei ka!” nitim.

41Wu ni kᵾⱡ mundmong minal etᵾk kᵾn, en enim ti ndi, ti waldᵾk nᵾk mel, “Wu ei nam? Kona kᵾpkᵾ na, nu ndi na, mel raⱡ ndi, wu ei nga ik teing ndunmbᵾⱡ ei ka!” nᵾtᵾng.